( أبونه اسمه العراق )

وطنّه ابوگفتك وياي ينشاد
اخوي ودوم گلبي اعليك ينشاد
ظهري لا تظن بجناب ينشاد
اليشدّه چماغك اتلفه عليـــــــــــــــه

...........

اخوي انته وعزيز وجيتك البيتك
وريدن للجروح اضماد خل أيدك

ماحاجه ندخّل للصلح اجناب
خاف اتشوف دمعي اتمسحه چفيتك

عليش احنه يخوي ابيش مختلفين
هاك أقره هويتي وشوف جنسيتك

صدگني نسابه ومن أصل فلاح
سِبّاح اللي بسمي امچلّب ابصيتك

عراقي آنه انگطع ومطشّرالخرزات
عيب الخيط بيدك شك عراقيتك

لتگلي مذاهب وحنه متفرقين
اذا ديني نِفس يكمل تره ابريتك

وذا هنه مصالح نتّفق بنصاف
أخذ كل الكراسي وصفي بس نيتك

غزونه والحرامي المستفيد بهاي
والباگ امس حجلي ايريد ترچيتك

شد چتفك ابچتفي الطامعين اهواي
بس ينفك نطاقي اتموت بيريتك

اوفك عينك يخوي انصيده ابوالزمير
اذا يعبر شبچتي اتصيده سلّيتك

أمس ابنك عمر يسألني وين أحسين
تدري اشگد معاني ابهاي مختصره

يعني ابن الرمادي امسيّر الميسان
وبن ادهوك يزرع نخله بالبصره

يعني لا حواجز لا ملل وقوام
ذاك الدين واضح نهتدي ابامره

خل أيدك ابأيدي ابن العراق اوگوم
عيب الطائفيه اثنينّه انستره

وخل نلبس عگلنه وروس مرفوعات
ابونه اسمه العراق وبيتنه اشكبره
ابونه اسمه العراق وبيتنه اشكبره

شكرا على هاي القصيدة الحلوة والله لايحرمنا منك ومن جديدك ان شاء الله التوفيق لهذا المنتدى الرائع تحيااااااااااتي رنوش

شكرا على هذه القصيدة الحلوة وان شاء الله العراق يرجع مثل ما جان واحسن وارفع راسك انت عراقي